Mercedes po përgatitet të garojë në Monza duke e ditur se Kimi Antonelli do ta nisë garën nga vendi i fundit. Ai që e konfirmoi këtë është drejtori sportiv Toto Wolff.

“Monza dhe Madridi shënojnë fillimin e një periudhe të rëndësishme për ne. Renditja në pistë është bërë aq e ngushtë sa disa ekipe mund të fitojnë vetëm bazuar në performancën e tyre, të bësh një gabim do të thotë të paguash një çmim të lartë. Jemi në formë të mirë në të dyja renditjet, por e gjithë skuadra e di se garat e ardhshme do të jenë të vështira”, tha shefi i Mercedes.

“Për ne, Monza fillon me një sfidë. Kimi do të marrë një penalizim për sistemin e fuqisë dhe do të nisë nga fundi. Është zhgënjyese për të dhe për tifozët italianë që do të donin ta shihnin të luftonte në krye në garën e tij në shtëpi, por në Formula 1 nuk ka vend për sentimentalitet”, tha Wolff.

“Duhet ta bëjmë këtë sakrificë duke pasur parasysh kampionatin. Qëllimi tani është i qartë: të zëmë sa më shumë pozicione të jetë e mundur dhe të maksimizojmë pikët. Në anën tjetër të garazhit, George mbërrin me vrull të mirë pas Zandvoort dhe do të përpiqet të hyjë me forcë në luftë që nga fillimi i fundjavës”, shtoi ai.

“Monza është një pistë që kërkon shumë energji, kalon pjesën më të madhe të xhiros duke e shtyrë sistemin e fuqisë deri në kufijtë e tij dhe nuk ke shumë mundësi për të rimbushur baterinë. Me rregulloret aktuale, kjo kërkon kompromise që do të duhet të menaxhohen me kujdes. Është një sfidë interesante, e cila ka të ngjarë të çojë në një fundjavë emocionuese”, përfundoi Wolff.