Me 22 rrëzime vitin e kaluar dhe 16 deri tani këtë sezon, Joan Mir ka regjistruar së bashku me një tjetër pilot numrin më të madh të rrëzimeve në MotoGP. Megjithatë, spanjolli thotë se kjo vjen nga rreziqet që duhet të marrë për të nxjerrë maksimumin nga Honda e tij.
Në 69 garat që ka zhvilluar me Honda-n, Mir është rrëzuar gjithsej 79 herë, mesatarisht më shumë se një herë për garë.
“Nuk ka një shpjegim të vetëm, sepse çdo rrëzim ka arsyen e vet”, tha Mir. Sipas tij, kur nisesh nga pjesa e pasme e vijës së nisjes, mënyra e garimit është shumë më ndryshe dhe duhet të marrësh më shumë rreziqe për t’u afruar me kreun.
“Shumë rrëzime vijnë nga përpjekja për të nxjerrë nga motori më shumë sesa mund të japë realisht. Jam një pilot me përvojë, por tani duhet të shfrytëzoj çdo mundësi për të arritur një rezultat të mirë, sepse nuk e di kur do të më vijë një tjetër mundësi”.
Mir pranon se ndonjëherë e shtyn veten përtej kufirit: “Duhet ta kontrolloj më shumë këtë impuls, sepse nuk e kam motorin për të bërë më shumë”.
“Di të ngas edhe pa u rrëzuar”
Ajo që bie më shumë në sy është kontrasti me shokun e skuadrës, Luca Marini, i cili është rrëzuar vetëm 13 herë në 51 gara me Honda-n.
Mir thotë se në një projekt konkurrues vlerësohet mbi të gjitha shpejtësia dhe përpjekja për të arritur rezultatin maksimal.
“Edhe unë di të ngas në mënyrën tjetër, pa u rrëzuar. Sigurisht, nëse ke shpejtësinë, të ecësh më ngadalë është shumë e lehtë. Por nëse nuk e ke shpejtësinë, të ecësh më shpejt është gjëja e vështirë”.
Për të, filozofia është e qartë: “Mos u mëso të ecësh më ngadalë, por shty veten të jesh gjithmonë një pilot më i mirë. Kurrë mos u kënaq me aq”.
Mir pranon se fakti që ka qenë kampion dhe e di se mund të garojë në krye e bën të marrë më shumë rreziqe.
“Kur ke fituar dhe e di që mund të jesh në krye, pyet veten pse nuk je aty dhe dëshiron të vazhdosh të marrësh rreziqe. Këto janë demonët e mi”.
Pas dyshimeve që kishte më parë për të ardhmen, Mir tani thotë se e ka rikthyer ambicien, dëshirën dhe entuziazmin për sezonin 2027, kur do të garojë për Gresini me një Ducati satelit.
