Sulmuesi i Kombëtares shqiptare, Myrto Uzuni, në fundjavën që shkoi shënoi kundër Alaves, duke arritur në kuotën e 10 golave në La Liga. Kjo nuk është pak për sulmuesin shqiptar, duke llogaritur se luan me një skuadër e cila duket e destinuar për të rënë nga kategoria.

Performancat e tij e kanë vënë në qendër të vëmendje, aq sa edhe e përditshmja spanjolle “Marca”, i ka kushtuar një artikull sulmuesit shqiptar, i cili po bën më së miri punën e tij në radhët e klubit të La Liga. “Uzuni, një snajper nga 11 metrat”, titullohet shkrimi, i cili kujton se sulmuesi e ka kthyer në specialitet gjuajtjen nga pika e bardhë.

“Edhe pse ka luajtur me gjilpëra dhe me dhimbje prej javësh, atij nuk iu dridh pulsi. Uzuni e ekzekutoi goditjen me saktësi, duke e çuar topin pranë shtyllës, për të bërë shtrirjen e portierit kundërshtar të pavlerë. Me golin e realizuar, lojtari nga Berati ka që tani 4 gola të shënuar nga 11 metrat, duke iu bashkuar Mayoral, Pepelu dhe Dovbyk si një nga specialistët e La Liga në këtë seksion”,- thuhet në artikullin e prestigjiozes spanjoll.

Mirëpo, nuk mbaron me kaq, pasi më tej, në artikull përmendet fakti se Uzuni ka realizuar 11 nga 13 penalltitë që ka gjuajtur me fanellën e Granada, me një përqindje të lartë realizimi, teksa theksohet edhe pasi u shpall golashënuesi më i mirë i La Liga 2 me 23 gola, ai ka ruajtur edhe këtë vit standartin në elitë.

“Shqiptari ka arritur që tani kuotën e 10 golave dhe e sheh veten përkrah sulmuesve si Gerard Moreno, Rodrigo, Hugo Duro dhe En-Nesyri”, shkruan gazeta spanjolle, duke i bërë kështu “thirrje”, tekniku Sylvinho, që të ketë në vëmendjen e tij edhe “bomberin” nga Berati, për fazën finale, të Kampionatit Evropian, Euro 2024.