MotoGP nuk është duke zhvilluar bisedime për shtimin e pistave të tjera rrugore në kalendar, duke theksuar se projekti i Adelaide do të mbetet një rast i veçantë për të ardhmen e afërt.

Kampionati shkaktoi debat të madh më herët gjatë vitit kur njoftoi se gara e Çmimit të Madh të Australisë do të zhvendoset nga pista tradicionale e Phillip Island në një pistë të re rrugore në Adelaide, duke filluar nga sezoni 2027.

Pista e re do të kalojë nëpër qendrën e qytetit dhe Victoria Park, në një zonë që më parë ka pritur garat e Formula 1 nga viti 1985 deri në vitin 1995.

Drejtori sportiv i MotoGP, Carlos Ezpeleta, deklaroi se aktualisht nuk ka plane për të përsëritur modelin e Adelaide në qytete të tjera.

“Sa i përket Adelaide, për momentin nuk po zhvillojmë asnjë bisedë tjetër të këtij lloji. Bota duhet së pari të shohë se si do të funksionojë ky projekt. Është një mundësi e jashtëzakonshme për MotoGP-në që të tregojë se kjo është e realizueshme”, tha ai.

Nën drejtimin e pronarit të ri, Liberty Media, MotoGP po synon të afrohet më shumë me tifozët, duke sjellë garat në zona urbane dhe tregje të rëndësishme komerciale.

Ndërkohë, kampionati po shqyrton mundësinë e zhvillimit të një gare në Miami në të ardhmen, por Ezpeleta theksoi se pista pranë stadiumit Hard Rock nuk mund të konsiderohet një pistë e mirëfilltë rrugore si ajo e Adelaide.

Sipas MotoGP-së, Adelaide pritet të mbetet i vetmi event i këtij lloji në kalendar për vitet e ardhshme.