Motorsport.com vlerëson të 11 skuadrat pas gjysmës së parë të sezonit 2026 të Formula 1. Radha i vjen Alpine, e cila fillimisht mori kontrollin e mesfushës, përpara se situata të bëhej më e vështirë.

Nga të gjitha skuadrat që e lanë pas dore sezonin 2025 ose e zhvendosën fokusin te viti 2026 shumë më herët, Alpine është ajo që ka përfituar më shumë nga kjo strategji.

Me motorë Mercedes, skuadra pati një fillim të fortë të sezonit. Megjithatë, gjysma e parë e vitit vlerësohet me notën B-, pasi rivalët e kapën përpara pushimit veror. Alpine e mbylli këtë fazë në vendin e gjashtë, pesë pikë pas Racing Bulls.

Të mirat

Pierre Gasly dhe Franco Colapinto u shpërblyen për sezonin e vështirë 2025, pasi Alpine nisi epokën si kliente e Mercedes-it me një makinë dukshëm më konkurruese.

Pas një gare të vështirë hapëse në Melburn, ku skuadra pati probleme me menaxhimin e njësisë së fuqisë, Alpine dominoi mesfushën.

A526 u shfaq rregullisht në Q3, veçanërisht me Gasly-n, ndërsa skuadra mori pikë në shtatë fundjavat e para të Çmimeve të Mëdha.

Kulmi erdhi në Monako, ku Gasly arriti podiumin pas një gare kontroverse. Fillimisht ai u penalizua me një shtesë kohe dhe humbi podiumin, por vendimi u rrëzua më vonë pas apelimit.

Gasly ka vazhduar formën e mirë të vitit 2025, e cila nuk mori vëmendjen e merituar për shkak të makinës së dobët të sezonit të kaluar.

Ndërkohë, Colapinto ka fituar më shumë besim dhe është bërë një pilot më i qëndrueshëm në mesfushë, duke zbehur edhe dyshimet për të ardhmen e tij afatgjatë.

Të këqijat

Ngjashëm me Haas, Alpine pati një fillim të fortë, por më pas u kap nga pjesa tjetër e mesfushës.

Skuadra humbi statusin e “më të mirës së pjesës tjetër” ndaj një Racing Bulls shumë konsistente, e cila vazhdoi të grumbullojë pikë dhe e kaloi Alpine-n në renditjen e konstruktorëve në Hungari.

Edhe Audi ka bërë hapa të mëdhenj përpara.

Nga një skuadër që rregullisht arrinte Q3, Alpine u detyrua të luftonte për të kaluar në Q2 në Hungari. Kjo lidhet me faktin se skuadra nuk ishte në të njëjtin ritëm me rivalët për sa i përket përditësimeve dhe, si pasojë, i mungonte forca aerodinamike.

Përmirësimi i madh i radhës pritet në Zandvoort, menjëherë pas pushimit veror. Ai do të tregojë më qartë nëse Alpine mund ta rifitojë avantazhin në garat e fundit të sezonit.

Çfarë thonë nga Alpine

Flavio Briatore, këshilltar ekzekutiv:

“Fakti që Racing Bulls përsëri mori pikë me të dyja makinat na ka zbritur në vendin e gjashtë në renditje. Thjesht duhet ta pranojmë se ata kanë bërë një punë më të mirë në këtë fazë të sezonit.

“E dimë që përmirësimet dhe përditësimet do të vijnë shumë shpejt dhe duhet të bëjmë hapa të mëdhenj, për të cilët e dimë se jemi të aftë.

“Duhet ta përdorim këtë ndjesi si motivim shtesë në Enstone për ta kthyer situatën. Kohët e fundit nuk kemi qenë mjaftueshëm të mirë, por ka ende gjysmën e sezonit përpara dhe ajo që ka më shumë rëndësi është vendi ku do ta mbyllim kampionatin në garën e fundit.”