Barcelona synon të kompletojë skuadrën deri në fillim të shtatorit, me të gjithë lojtarët e saj të regjistruar në La Liga për sezonin e ri.

Sipas të përditshmes spanjolle Mundo Deportivo, klubi katalanas është i bindur se do ta përmbyllë me sukses procesin e regjistrimit të futbollistëve para afatit zyrtar të 30 gushtit.

Megjithëse disa lojtarë janë ende në pritje të miratimit, drejtuesit e klubit nuk presin pengesa serioze dhe janë të sigurt se gjithçka do të zgjidhet në kohë.

Një nga lëvizjet kyçe në këtë drejtim është largimi i pritur i mesfushorit Oriol Romeu, i cili do të krijojë hapësirën e nevojshme brenda strukturës së skuadrës.

Pasi kjo të realizohet, Gerard Martin do të mund të regjistrohet zyrtarisht si pjesë e ekipit, dhe pritet të jetë i gatshëm për ndeshjen kundër Levantes.

Në të njëjtën situatë janë edhe Inaki Peña dhe Héctor Fort, të cilët gjithashtu janë në proces regjistrimi dhe sipas klubit, do të marrin miratimin brenda afatit të caktuar.

Barcelona, e cila po përpiqet të balancojë situatën financiare me nevojat sportive, mbetet e vendosur të fillojë sezonin me një grup të plotë dhe të gatshëm për të konkurruar në të gjitha frontet.