BMW ka prezantuar gjeneratën e re të Serisë 3, e cila sjell ndryshime të mëdha në dizajn, teknologji dhe gamën e motorëve. Një nga risitë kryesore është vendimi i kompanisë për të hequr motorët dizel nga oferta.

Modeli i ri është më i madh dhe më agresiv në pamje, ndërsa versioni më i fuqishëm, M350 xDrive, ka motor 3.0-litërsh me gjashtë cilindra dhe sistem mild-hybrid. Ai zhvillon 443 kuaj fuqi, përshpejton nga 0 në 100 km/h për vetëm 4,1 sekonda dhe arrin shpejtësinë maksimale prej 250 km/h.

M350 xDrive sjell edhe për herë të parë një “Drift Mode”, ndërsa në kabinë bie në sy ekrani qendror 17,9-inç. BMW ka hequr gjithashtu rrotën tradicionale të sistemit iDrive, duke e orientuar kabinën drejt një koncepti më tërësisht digjital.

Në versionet më të thjeshta, BMW 318 ka 156 kuaj fuqi, ndërsa BMW 320 zhvillon 211 kuaj fuqi. Për vitin 2027 pritet edhe modeli hibrid plug-in 330e me rreth 300 kuaj fuqi.

Çmimet për tregun gjerman nisin nga 49.900 euro për BMW 318, ndërsa BMW 320 kushton 54.900 euro. Për versionin M350 xDrive, blerësit duhet të paguajnë 80.900 euro.

Prodhimi në Gjermani pritet të nisë së shpejti, ndërsa dërgesat e para për klientët evropianë janë planifikuar në fillim të vitit 2027.