Anija mallrash Fremantle Highway u përfshi nga flakët pranë brigjeve të Holandës në vitin 2003, ndërsa ishte në rrugën e saj për në Azi. Në bord kishte 3,800 makina, përfshirë 260 BMW të reja që i mbijetuan zjarrit pa dëme serioze. Kompania e sigurimeve i shiti automjetet e padëmtuara me një çmim të volitshëm dhe një grup sipërmarrësish holandezë i blenë makinat. Plani ishte që automjetet të shiseshin në tregun evropian.

Ata paguan rreth 22,500 euro për makinë, shumë më poshtë vlerës mesatare të tregut të automjeteve. Fillimisht, BMW dha dritën jeshile për shitjen për sa kohë që tregtarët i informonin blerësit për historinë e zjarrit dhe mungesën e një garancie fabrike. Por në mes të procesit, prodhuesi ndryshoi plotësisht kursin dhe vendosi që të gjitha makinat duhej të shkatërroheshin, duke përmendur defekte të mundshme të fshehura dhe faktin se modelet ishin prodhuar në të vërtetë për tregun aziatik, shkruan Hak, transmeton AutoPortali.

Mosmarrëveshja është çuar tashmë në gjykatë, ku BMW fitoi një vendim të shkallës së parë. Klientët apeluan dhe makinat janë ende të parkuara në një parking të rrethuar në Zevenbergen, Holandë. Për të vërtetuar se automjetet ishin në gjendje të mirë, pronarët vendosën të ftonin gazetarët për një provë drejtimi. Por pak para se të fillonte eventi, avokatët e BMW ndërmorën veprime ligjore për t’i ndaluar ata, raporton Autoblog.

Kërcënimi i BMW-së ishte i qartë. Nëse ndonjë nga gazetarët do të kalonte qoftë edhe një metër larg makinave, do të përballej me një gjobë prej 250,000 eurosh. Politika e BMW-së mund të konsiderohet e çuditshme, por këto janë shumë automjete që mund të shkaktojnë dëme serioze në reputacionin e prodhuesit gjerman nëse përfundojnë në rrugë.