Kevin De Bruyne vlerëson se është shumë herët për të marrë në konsideratë të ardhmen e tij në futbollin ndërkombëtar, pasi Belgjika humbi 1-0 nga Franca në raundin e 16-të në EURO 2024.

Autogoli i Jan Vertonghen në minutën e 85-të ishte diferenca midis dy kombëtareve në “Arena Düsseldorf”.

De Bruyne, 33 vjeç, ishte pjesë e Belgjikës që përfundoi e treta në Kupën e Botës në 2018, por ata nuk kanë arritur në gjysmëfinale të një turne të madh që atëherë.

“Është shumë herët për t’u përgjigjur,” u tha De Bruyne gazetarëve kur u pyet nëse humbja nga Franca mund të sjellë fundin e karrierës së tij ndërkombëtare. “Më lejoni ta përpunoj këtë humbje. Ka qenë një sezon shumë i gjatë. Më duhet të pushoj trupin tim. Do ta marr vendimin pas verës”, është shprehur fantazisti belg.

De Bruyne, i cili bëri debutimin e tij me Belgjikën në vitin 2010 dhe ka mbi 100 paraqitje për vendin e tij, mbetet një pjesë integrale e planeve të trajnerit Domenico Tedesco përpara Kupës së Botës në Shtetet e Bashkuara, Meksikë dhe Kanada në vitin 2026.