Piloti i Yamaha-s, Fabio Quartararo, është penalizuar nga MotoGP pas garës për Çmimin e Madh të Britanisë.

Ai mori një penalizim prej 16 sekondash pas garës së MotoGP në Silverstone.

Francezi humbi kështu vendin e 12-të që kishte zënë në finish, si piloti më i mirë i Yamaha-s, për shkak të një shkeljeje teknike që lidhej me të dhënat e presionit të gomave.

Stjuardët e FIM MotoGP shpjeguan se të dhënat për presionin e gomave në motorin e Quartararos “nuk ishin transmetuar siç duhet”.

“Pas përfundimit të garës, motori u dërgua për kontroll teknik. Gjatë kontrollit u konstatua se marrësi në motor nuk ishte konfiguruar siç duhet për të marrë të dhënat e presionit nga sensori i gomës së përparme.

“ID-ja e sensorit nuk ishte regjistruar në bazën e të dhënave të marrësit, për shkak të së cilës gjatë garës nuk u regjistruan të dhënat reale të presionit të gomës së përparme”, thuhet në vendimin e stjuardëve.

Për këtë arsye, Quartararo mori të njëjtin penalizim që u jepet pilotëve kur nuk respektojnë presionin minimal të përcaktuar për gomat.

Stjuardët theksuan se përdorimi i sensorëve të presionit të gomave (TAPS) në të gjitha rrotat, si përpara ashtu edhe pas, është i detyrueshëm në kategorinë MotoGP dhe se të dhënat e tyre duhet të regjistrohen në mënyrë të vazhdueshme.

Sipas protokollit të penalizimeve për presionin e gomave në MotoGP, shkelja në fjalë dënohet me 16 sekonda, të cilat i shtohen kohës së rezultatit përfundimtar të garës.

Si pasojë e këtij penalizimi, Quartararo zbriti nga vendi i 12-të në vendin e 16-të dhe të fundit.

Kështu, piloti i Yamaha-s largohet nga Silverstone pa marrë asnjë pikë në kampionat.