Golden Eagle Ylli do ta kërkojë fitoren e cila të dërgon në gjysmëfinale të play-off-it, në Superligën e basketbollit.

Suharekasit udhëtojnë në Prizren për t’u përballur me Bashkimin. Ndeshjen e parë, ekipi therandas e ka fituar bindshëm 87:69.

Në përballjen e parë, basketbollisti më efikas i Yllit ishte Alonzo Verge Jr me “double-double”, 26 pikë e 12 asistime. Ai u ndihmua edhe nga dyshja Grimes e Nesbitt me 17, respektivisht 12 pikë.

Në krahun tjetër, për prizrenasit nuk kryen punë 27 pikët e Lejson Zeqirit.

Edicionin e rregullt, Ylli e përfundoi në pozitën e tretë me 19 fitore e nëntë humbje, kurse Bashkimi i gjashti me 11 fitore e 17 humbje.

Në gjysmëfinale kualifikohet skuadra që i shënon dy fitore, ku i pret Peja, e cila e ka përparësinë e fushës në gjysmëfinale.

Përballja mes Bashkimit e Golden Eagle Yllit zhvillohet të enjten me fillim nga ora 18:00.