Piloti nga Zelanda e Re, Hayden Paddon, thotë se vendi i dytë në Rally Paraguay “u ndje si fitore” dhe ishte përgjigje për ata që kishin dyshuar te rikthimi i tij në WRC.

Paddon u rikthye këtë sezon në elitën e WRC-së për herë të parë që nga viti 2018, pasi Hyundai e përfshiu në rotacionin e pilotëve për makinën e tretë fabrike i20 N Rally1.

Fillimisht ai ishte planifikuar të garonte vetëm në asfalt, por më pas iu dha mundësia të merrte pjesë edhe në Rally Paraguay, një terren që i përshtatet më shumë pasi preferon sipërfaqet me zhavorr.

Paddon shkëlqeu që në ditën e parë, duke marrë kryesimin e garës të premten. Në fund përfundoi i dyti, pas fituesit Sami Pajari të Toyota-s.

“Ky podium ndihet si një fitore e vërtetë. Për të qenë i sinqertë, ndihet si fitore. Shumë njerëz na kishin hequr nga llogaritë dhe mendonin se ishim një zgjedhje qesharake këtë vit. Por shumë njerëz besuan tek unë dhe ne besuam te vetja”, tha Paddon pas finishit.

Ai shtoi se rezultati tregon se nuk duhet të dorëzohesh kurrë dhe duhet të guxosh të besosh te ëndrrat e tua. Gjithashtu falënderoi Hyundai-n, ekipin e tij në Zelandën e Re dhe bashkëpilotin John Kennard, me të cilin bashkëpunon prej 22 vitesh.

E ardhmja e Paddon në WRC mbetet ende e paqartë, pasi programi i tij për vitin 2026 me Hyundai ka përfunduar. Megjithatë, ai do të vazhdojë të punojë me markën koreane në zhvillimin e makinës së re Rally2, e cila pritet të garojë në WRC vitin e ardhshëm.