Me ardhjen e ditëve më të ftohta të vjeshtës dhe ndryshimeve të mëdha mes temperaturave të mëngjesit dhe ditës, shumë shoferë përballen me një paralajmërim të papritur në panelin e makinës: ndezet llamba e verdhë e presionit të gomave.

Shumë shoferë menjëherë mendojnë se goma është shpuar ose dëmtuar, por në shumicën e rasteve arsyeja mund të jetë shumë më e thjeshtë, ndryshimi i temperaturës.

Kur temperatura bie, ajri në goma tkurret dhe presioni mund të ulet. Një ndryshim i madh i temperaturës mund të shkaktojë ulje të presionit edhe për më shumë se 0,2 bar.

Pse ndizet llamba në mëngjes?

Nëse gomat kanë qenë më herët të fryra pranë kufirit minimal të rekomanduar, sensori TPMS mund të regjistrojë rënien e presionit gjatë një mëngjesi të ftohtë dhe të aktivizojë paralajmërimin.

Kur ndizet llamba, duhet të kontrolloni sa më shpejt presionin e gomave dhe ta krahasoni me vlerat e rekomanduara nga prodhuesi. Këto të dhëna zakonisht gjenden në etiketën në shtyllën e derës së shoferit, brenda kapakut të rezervuarit ose në manualin e automjetit.

Presioni i ulët mund të ndikojë në stabilitet, të zgjasë distancën e frenimit, të rrisë konsumin e karburantit dhe të përshpejtojë konsumimin e gomave.

Nga ana tjetër, presioni i tepërt e bën makinën më të fortë dhe më pak komode, ndërsa zvogëlon kontaktin e gomës me asfaltin dhe shkakton konsumim jo të njëtrajtshëm.

Sidomos pronarët e SUV-ve dhe automjeteve më të rënda duhet ta kontrollojnë rregullisht presionin gjatë muajve të ftohtë.

Këshilla kryesore për shoferët është e thjeshtë: mos i fryni gomat me hamendje. Kontrollojeni presionin kur gomat janë të ftohta, idealisht në mëngjes para një udhëtimi të gjatë. Kjo ndihmon në shmangien e paralajmërimeve të panevojshme dhe garanton stabilitet më të mirë në rrugët e ftohta dhe të lagështa.