Legjenda e Kampionatit Botëror të Rally-t, Sebastien Loeb, do të rikthehet këtë fundjavë në garat tradicionale të rally-t pas një mungese të gjatë.

Kampioni nëntë herë i botës, aktualisht pjesë e Dacia në Kampionatin Botëror Rally-Raid, do të marrë pjesë në garën Rallye Vosges – Grand Est, e vlefshme për kampionatin francez të rally-ve në asfalt.

52-vjeçari do të garojë së bashku me bashkëdrejtuesen Laurène Godey me një Ford Fiesta WRC të vitit 2017, të ndërtuar nga M-Sport. Ky është i njëjti automobil që më parë është drejtuar nga Sébastien Ogier dhe Elfyn Evans në Kampionatin Botëror të Rally-t.

Loeb deklaroi se është i emocionuar të rikthehet në asfalt dhe të garojë sërish në kampionatin francez.

Kjo do të jetë hera e parë që ai garon me një makinë të nivelit më të lartë WRC që nga viti 2022, kur mori pjesë në disa gara me ekipin M-Sport Ford, duke përfshirë edhe fitoren e tij të 80-të në karrierë në Monte Carlo.

Gara do të zhvillohet në 12 etapa asfaltike me gjatësi totale prej 199.6 kilometrash, nga e shtuna deri të dielën.