Holanda siguroi rikthimin në gjysmëfinalet e një Evropiani pas 20 vitesh. “Tulipanët” do të sfidojnë Anglinë në datën 10 korrik në “Signal Iduna Park”.

Ata janë në misionin për të mbërritur në finalen e madhe të Berlinit, për të tentuar më pas fitimin e Evropianit të dytë në histori pas suksesi në 1988.

Spanjë-Francë është gjysmëfinalja tjetër e EURO 2024, e programuar për datën 9 korrik në “Allianz Arena” të Mynihut.

Trajneri Ronald Koeman është i përqendruar te dueli i së mërkurës përballë “Tre Luanëve”, ndërkohë që e ka një preferencë në lidhje me finalen.

“Spanja apo Franca? Do të doja një finale kundër spanjollëve, pasi me Francën u ndeshëm në grupe“, u shpreh timonieri i Holandës.

E nëse ndodh do të përsëritej finalja e Kupës së Botës 2010, kur iberikët fituan Botërorin e parë në histori falë golit të Iniestës në kohën shtesë.