Charles Leclerc u rendit i treti në garën e fundit të Formula 1, zhvilluar në Arabinë Saudite, duke siguruar podiumin e parë sezonal. Në prag të garës së Australisë, këtë fundjavë, piloti i Ferrarit e sheh si pozitiv këtë start, me dy vende të treta nga pilotët e “kokëkuqes”.

“Mendoj se jemi në pozitë më të mirë se vitin e kaluar. Kur fillimisht pilotuam me makinën e vitit të kaluar, ajo nuk performoi ashtu siç prisnim. Ndaj ishte pak e vështirë për të kuptuar se nga vinte problemi dhe e identifikuam me vonesë atë që na pengonte”, u shpreh Leclerc.

Ato ndjesi ndjesi Leclerc i ka lënë pas dhe është i fokusuar tek e ardhmja: “Sidoqoftë këtë vit, makina nuk ka asgjë të keqe. Të paktën bën gjithçka që presim, që është një pikënisje e mirë. Mund të fokusohemi menjëherë te përmirësimi i saj, gjë që më jep besim se ritmi i zhvillimit do të jetë më i mirë se vitin e kaluar”.

Në Australi, Leclerc i kërkohet të kompensojë një nga garat më zhgënjyese të vitit 2023, ku pas një kontakti që në start u tërhoq. “Red Bull mbetet favorite edhe aty, por do të shohim nëse mund të shkojmë më lart se vendi i tretë. Besimi nuk mungon, të shohim se si do të reagojë makina”, tha Leclerc.