Lufta për çmimet e makinave elektrike ka arritur kulmin! Pasi Dacia njoftoi lançimin e makinës së vogël elektrike me katër vende, Hipster, me çmim rreth 11.000 euro, gjiganti Stellantis dhe marka e tij italiane Fiat po përgatisin kundërpërgjigjen.

Në panairin e ardhshëm të automjeteve në Paris, Fiat do të prezantojë disa modele të reja, ndërsa njëri prej tyre është koncepti misterioz që paralajmëron një makinë elektrike për masat, Fiat Pandina E-Car.

Sipas revistës franceze “L’Argus”, njëri nga dy konceptet sekrete që Fiat do të sjellë në Paris do të jetë pikërisht vizioni për modelin e ardhshëm Pandina E-Car.

Fiat prezanton konceptin Pandina E-Car

Ky automobil elektrik kompakt, i thjeshtë dhe mbi të gjitha i përballueshëm po zhvillohet si pjesë e një projekti global, me synimin për të ulur ndjeshëm kostot e prodhimit dhe për të ofruar një makinë elektrike me çmim që mund ta përballojë një blerës mesatar evropian.

Modeli i prodhimit pritet të dalë në rrugë në vitin 2028, ndërsa panairi i Parisit do të jetë mundësia e parë e madhe për të parë se si Fiat synon të konkurrojë me makinat e lira elektrike kineze dhe Dacian.

Çfarë po fsheh Fiat?

Në Paris do të prezantohen për herë të parë edhe modelet e reja Grizzly dhe Grizzly Fastback, duke zgjeruar praninë e Fiat-it në segmentin C. Këto modele do t’i bashkohen gamës ekzistuese, ku përfshihen Grande Panda, 500, 600 dhe Topolino.

Ndërkohë, koncepti i dytë që Fiat po sjell në Paris mbetet sekret. Kompania ka deklaruar vetëm se prototipet do të tregojnë drejtimin më ambicioz të strategjisë së saj për të ardhmen.

Një gjë duket e sigurt: gara për makinat elektrike të lira në Evropë sapo ka filluar, ndërsa konkurrenca mes Fiat-it, Dacias dhe prodhuesve kinezë pritet të jetë një nga zhvillimet më interesante të industrisë së automjeteve në vitet e ardhshme.