Pas imazhit të kyçit të këmbës të fryrë në finalen e Copa America, që e detyroi të linte fushën, Lionel Messi qetësoi fansat e tij me një mesazh në rrjetet sociale.

“Copa America ka mbaruar dhe gjëja e parë që dua të bëj është t’ju falënderoj të gjithëve për mesazhet. Jam mirë, falë Zotit, dhe shpresoj që së shpejti të rikthehem në fushë duke bërë atë që dua të bëj”, ka shkruar lojtari i Inter Miamit.

Messi më pas la një koment për Di Marían, i cili luajti ndeshjen e tij të fundit për kombëtaren, si dhe kujtoi Otamendin mes veteranëve.

“Jam shumë i lumtur, veçanërisht sepse ia arritëm qëllimit dhe Fideo (Di María) na la me një trofe më shumë. Lojtarët më të vjetër, si ai, Ota (Otamendi) dhe unë e përjetuam Kupën e Amerikës me një entuziazëm të veçantë, me shokë të tjerë të skuadrës që kanë luajtur tashmë në disa turne dhe që kanë shtuar gjithashtu përvojën e tyre, me një grup të rinjsh që japin gjithçka.

Ne jemi një ekip dhe gjithashtu një familje, një grup spektakolar. Faleminderit të gjithëve që na mbështetën, ky ekip ka një të tashme dhe një të ardhme të mrekullueshme.”