Formula 1 dhe Motorsport Network kanë publikuar Anketën Globale të Tifozëve për vitin 2025, me mbi 100,000 pjesëmarrës nga 186 vende. Rezultatet tregojnë një rritje të ndjeshme të interesit nga gratë, të rinjtë dhe audienca amerikane, duke shënuar një epokë të re të tifozërisë moderne.

Sipas studimit, 3 nga 4 tifozë të rinj janë gra, dhe gati gjysma e pjesëtarëve të Gjeneratës Z janë femra. Në SHBA, 70 për qind e të rinjve angazhohen çdo ditë me përmbajtje të F1, kryesisht në rrjete sociale dhe platforma streaming.

Tifozët e sotëm nuk janë më thjesht shikues – 90 për qind e tyre janë emocionalisht të lidhur me garat, ndërsa 61 për qind ndërveprojnë çdo ditë me përmbajtje nga F1. Interesi për pjesëmarrje në evente live po rritet, ndërsa F1 Academy po fiton terren, veçanërisht te gratë dhe të rinjtë.

Sipas drejtuesve të F1 dhe Motorsport Network, kultura, tregimet dhe mediat sociale po luajnë rol kyç në tërheqjen e audiencës së re, ndërsa sponsorët dhe përvojat live po thellojnë lidhjen me sportin.