Lando Norris beson se Ferrari do të dominonte Formula 1 nëse do të kishte një motor më konkurrues. Sipas tij, skuadra italiane aktualisht ka shasinë më të mirë në kampionat, por po humb terren për shkak të performancës së motorit.

Mercedes ka dominuar sezonin 2026, duke fituar gjashtë garat e para, por në Barcelonë ishte Lewis Hamilton që i dha Ferrarit fitoren e parë të sezonit pas një pakete të madhe përmirësimesh.

“Jemi me fat që Ferrari nuk ka një motor më të mirë për momentin. Nëse do ta kishte, ata do të dominonin kampionatin”, tha Norris. “Në kthesa janë klasi i fushës dhe ne nuk jemi as afër tyre. Nëse përmirësojnë motorin, do t’i turpërojnë të gjithë”.

Sipas të dhënave të fundit teknike, Ferrari ka mbetur mbi 4 për qind pas rivalëve në performancën e motorit, çka i jep mundësinë të përdorë dy “token” zhvillimi që mund të ndryshojnë situatën gjatë sezonit.

Edhe piloti i McLaren, Oscar Piastri, pranoi se Ferrari ka bërë hapa të mëdhenj përpara. Ai theksoi se makina italiane ka shumë forcë shtypëse (downforce), gjë që e ndihmon veçanërisht në menaxhimin e gomave gjatë garave.

Pas garës në Barcelonë, McLaren renditet e treta në kampionat, 49 pikë pas Ferrarit dhe 121 pikë pas Mercedesit.