Presidenti i FIA-s, Mohammed Ben Sulayem, është optimist se Argjentina mund të rikthehet në kalendarin e Kampionatit Botëror të Rally-t (WRC) në të ardhmen e afërt.

Argjentina ka një histori të gjatë në WRC dhe ka organizuar gara rregullisht nga viti 1980 deri në 2019. Pas largimit nga kalendari, kampionati u rikthye në Amerikën e Jugut në vitin 2023 me një garë në Kili, ndërsa më pas iu shtua edhe Paraguai.

Mundësia e rikthimit të Argjentinës ishte diskutuar edhe në vitin 2022, por negociatat nuk sollën rezultat. Tashmë, bisedimet kanë nisur sërish.

“Argjentina ka një histori të madhe me rally-t. Kam garuar dy herë atje dhe etapat janë shumë të mira, tifozët janë të pranishëm dhe nuk ka arsye që të mos rikthehemi”, tha Ben Sulayem.

Gjatë një konference në Buenos Aires, ai shtoi se FIA dhe promotori i WRC-së po punojnë së bashku për rikthimin e garës.

“Gjërat po shkojnë shumë mirë dhe jam optimist se do të shohim një garë të WRC-së sërish në Argjentinë, aty ku i takon”, deklaroi presidenti i FIA-s.

Në rastin më të hershëm, Argjentina mund të rikthehet në kalendar në vitin 2028, pasi fillimisht duhet të zhvillohet një rally kandidat që FIA ta vlerësojë.