Shqipëria po shënon përparim të ndjeshëm në drejtim të transportit të gjelbër dhe të qëndrueshëm. Sipas të dhënave të fundit nga Drejtoria e Përgjithshme e Shërbimeve të Transportit Rrugor (DPSHTRR), në gjashtëmujorin e parë të vitit 2025 janë regjistruar gjithsej 2.323 automjete elektrike, duke shënuar një rritje prej 82 për qind krahasuar me të njëjtën periudhë të vitit të kaluar.

Përdorimi i teknologjive të pastra po kthehet gjithnjë e më shumë në një zgjedhje të preferuar për qytetarët shqiptarë. Në periudhën janar-qershor 2025, 25.2 për qind e të gjitha automjeteve të regjistruara për herë të parë ishin elektrike. Kjo prirje e qartë tregon rritjen e ndërgjegjësimit ndaj mjedisit dhe interesin në rritje për mjete me konsum të ulët dhe ndotje të reduktuar, shkruan AutoPortali.

Flota e përgjithshme e automjeteve elektrike në Shqipëri ka arritur në 8.701 njësi deri në fund të qershorit, duke reflektuar një rritje vjetore prej 36 për qind. Rritje të ndjeshme kanë pësuar edhe automjetet hibride, me të dhënat që tregojnë se 51 për qind e mjeteve të regjistruara rishtazi gjatë këtij viti janë ose elektrike, ose hibride plug-in.

Kjo transformim pozitiv i sektorit të transportit ka sjellë edhe përfitime të rëndësishme për mjedisin. DPSHTRR raporton se, si rezultat i shtimit të automjeteve elektrike dhe hibride, janë reduktuar rreth 11 milionë kilogramë emetime të dioksidit të karbonit (CO₂) në atmosferë çdo vit. Për më tepër, ulja e ndotësve atmosferikë është llogaritur në rreth 383 metra kub, një shifër që përfaqëson një përmirësim konkret të cilësisë së ajrit në vend.

Në të njëjtën linjë me zhvillimet pozitive, 74 për qind e autoveturave të regjistruara gjatë kësaj periudhe përmbushin standardet Euro 5 ose më të larta, duke e afruar Shqipërinë me standardet evropiane të transportit dhe duke kontribuar në ndërtimin e një flote më të pastër e më efikase.

Kjo tendencë përbën një hap të rëndësishëm drejt dekarbonizimit të transportit dhe ndërtimit të një të ardhmeje më të qëndrueshme për Shqipërinë.