Të paktën 11 persona kanë humbur jetën dhe 12 të tjerë janë plagosur gjatë një sulmi me armë që ndodhi të dielën në një fushë futbolli në shtetin qendror të Meksikës, Guanajuato, njoftuan autoritetet lokale.

Ngjarja ndodhi në një lagje të qytetit Salamanca, ndërsa zyrtarët lokalë kanë nisur një operacion për të gjetur përgjegjësit e sulmit.

“Janë konfirmuar vdekjet e 11 personave, 10 prej të cilëve vdiqën në vendngjarje dhe një tjetër gjatë marrjes së ndihmës mjekësore në spital,” thuhet në deklaratën e zyrës së kryetarit të bashkisë.

“Për më tepër, 12 persona janë plagosur nga të shtënat dhe po marrin ndihmë mjekësore,” shtoi po ashtu deklarata.

Autoritetet raportuan se katër qese që përmbanin mbetje njerëzore u gjetën gjithashtu të shtunën në mbrëmje në të njëjtin qytet, duke shtuar shqetësimet për sigurinë në rajon.

Guanajuato, një qendër industriale e zhvilluar dhe vend i disa destinacioneve të njohura turistike, vazhdon të mbetet shteti më i vdekjeprurës në Meksikë për shkak të konflikteve midis bandave, sipas statistikave zyrtare të vrasjeve.

Presidentja e Meksikës, Claudia Sheinbaum, tha në fillim të vitit se norma e vrasjeve në vend gjatë vitit 2025 kishte rënë në nivelin më të ulët në një dekadë, si rezultat i strategjisë kombëtare të sigurisë të administratës së saj./AutoPortali