FIA po finalizon rregulloren teknike të WRC 2027, që synon të ulë kostot, të rrisë sigurinë dhe të tërheqë më shumë prodhues. Makinat e reja do të kenë kufi kostoje prej 345,000 euro, motorë me 300 kuaj fuqi, shasi “space frame” dhe komponentë nga Rally2. Përdorimi i fibrës së karbonit do të kufizohet, ndërsa siguria do të jetë më e lartë se tek makinat aktuale Rally1.

Nga viti 2027, makinat e reja do të garojnë krahas atyre të Rally2, por qëllimi është që t’i zëvendësojnë gradualisht. Prodhuesit dhe tuners do të kenë liri në dizajnin e karrocerisë, ndërsa një dizajn unik i kafazit mbrojtës do të jetë i detyrueshëm për të gjithë.

Fillimisht, makinat do të përdorin motorë të homologuar Rally2, por FIA po shqyrton mundësinë për të lejuar edhe motorë prodhimi. Aktualisht, vetëm Toyota po zhvillon një koncept për 2027, ndërsa Hyundai është kritik ndaj rregullores dhe kërkon më shumë hapësirë për teknologji hibride apo elektrike.