Ylli i ri i Barcelonës, Lamine Yamal startoi mbrëmë në “Santiago Bernabeu” për skuadrën katalonase në ndeshjen e javë së 32-të në La Liga.

Real Madridi triumfoi 3:2 në El Clasico, për të mbyllur garën për titull, pasi tani janë 11 pikë larg vendit të dytë, e që janë pikërisht katalunasit.

Yamal është 16 vjeç e 283 ditë dhe është lojtari i dytë më i ri që ka startuar në El Clasico.

Megjithatë, kjo nuk i ka mjaftuar për të vendosur rekord.

Është Vicenc Martinez, një mbrojtës i krahut që filloi El Clasicon e tij të parë (dhe të vetme) në moshën 16 vjeç e 280 ditë.

Në tetor të vitit të kaluar, Lamine theu rekordin e Vicencut duke u bërë lojtari më i ri që ka luajtur – por jo që ka startuar nga minuta e parë në El Clasico.

Çuditërisht, Martinez arriti vetëm shtatë paraqitje për Barcelonën. Mirëpo, emri i tij ka mbetur në librat e historisë së klubit për gati një shekull. Ai vendosi rekordin e tij si titullari më i ri në El Clasico në 1941.