FC Barcelona po përballet me vështirësi serioze lidhur me stadiumin e saj historik, Camp Nou, i cili është aktualisht në rikonstruksion.

Pavarësisht pritshmërive që stadiumi do të ishte funksional për fillimin e sezonit të ri të La Ligës, punimet nuk kanë përfunduar ende dhe afatet janë shtyrë, përcjell AutoPortali.

Për shkak të këtyre vonesave, Barcelona do të detyrohet të zhvillojë ndeshjet e para të sezonit të ri si mysafire.

Më shqetësuese është fakti se ende nuk është caktuar vendndodhja për ndeshjen e parë “në shtëpi” ndaj Valencias, e cila tradicionalisht do të ishte luajtur në Camp Nou.

Klubi është në kërkim të zgjidhjeve alternative dhe po shqyrton mundësinë e zhvendosjes në stadiume të tjera përkohësisht, siç ndodhi edhe sezonin e kaluar me “Estadi Olímpic Lluís Companys”.

Në një deklaratë për mediat, presidenti i Barcelonës, Joan Laporta, konfirmoi se klubi i ka kërkuar UEFA-s leje të veçantë për të zhvilluar ndeshjen e parë të Ligës së Kampionëve si skuadër mysafire.

Ai shprehu besim se UEFA do ta mirëkuptojë situatën e krijuar për shkak të rrethanave jashtë kontrollit të klubit.

“Po bëjmë gjithçka që është e mundur për të garantuar që skuadra të ketë një ambient të përshtatshëm për të konkurruar, edhe nëse kjo nënkupton të luajmë jashtë Camp Nou-t për një periudhë të kufizuar. Dua të falënderoj personalisht presidentin e UEFA-s, Aleksander Čeferin, për mirëkuptimin dhe mbështetjen që ka treguar ndaj klubit tonë gjatë kësaj faze të vështirë,” u shpreh Laporta.

Ky zhvillim pritet të ketë ndikim jo vetëm në aspektin sportiv, por edhe në përvojën e tifozëve dhe të ardhurat nga shitja e biletave.

Megjithatë, drejtuesit e Barcelonës janë optimistë se situata do të përmirësohet dhe se rikonstruksioni i Camp Nou-t do të sjellë përfitime afatgjata për klubin, tifozët dhe qytetin. /AutoPortali