Pep Guardiola ka konfirmuar se Manchester City do të jetë puna e fundit e tij në një klub si trajner.

Guardiola ka shijuar tetë vite e gjysmë të shkëlqyera në “Etihad”, duke e udhëhequr Cityn drejt gjashtë titujve të Premier Ligës dhe shumë trofeve të tjerë.

Katalanasi është aktualisht në mes të periudhës së tij më të vështirë të karrierës, me Cityn që ka fituar vetëm një nga tetë ndeshjet e fundit në të gjitha garat.

“Unë nuk do të drejtoj një ekip tjetër,” tha ai.

“Nuk po flas për të ardhmen afatgjatë, por ajo që nuk do të bëj është të largohem nga City, të shkoj në një vend tjetër dhe të bëj të njëjtën gjë si tani. Nuk do të kisha energji… Mendimi për të filluar diku tjetër, i gjithë procesi i stërvitjes e kështu me radhë… Jo, jo, jo! Ndoshta një ekip kombëtar, por kjo është ndryshe. Unë duhet të ndaloj, si këta kuzhinierë që shkojnë në vende të tjera. Të ndalem dhe të shoh se çfarë kemi bërë mirë dhe çfarë mund të bëjmë më mirë dhe kur je i zënë gjithë ditën, ditë pas dite, nuk ke kohë për ta bërë këtë. Dua ta lë këtë dhe të shkoj të luaj golf, por nuk mundem. Mendoj se ndalimi do të më bënte mirë”, ka shtuar 53-vjeçari Guardiola.