Sot (e mërkurë) zhvillohen katër ndeshjet kthyese të fazës ‘play-off’ të Ligës së Kampionëve. Dje u luajtën katër ndeshjet e para të ‘play-off’-it, ku nuk munguan befasitë, sikurse ajo e Feynoordit që eliminoi Milanin dhe Club Brugge që eliminoi Atalantan. Tutje kaluan edhe Bayern Munich e Benfica.

Interesant pritet të jetë edhe në katër ndeshjet e sotme, ku në dy nga to ka mbetur gjithçka e hapur rreth kalimit në fazën tjetër, ndërsa dy ndeshjet tjera favoritët janë shumë më të qartë.

Ndeshja më e fortë padyshim se pritet të jetë ajo në mes të Real Madridit dhe Manchester Cityt në ‘Santiago Bernabeu’, me “Los Blancos” që janë paksa të favorizuar pas fitores 3-2 në ndeshjen e parë.

Përballje e fortë pritet të zhvillohet edhe në Holandë, ku PSV Aindhoven do të tentojë të eliminojë Juventusin, pas humbjes 2-1 në ndeshjen e parë të luajtur në Itali.

Në dy takimet tjera: Borusia Dortmund-Sporting Lisbona dhe Paris Sent Germain-Brest gjithçka duket më e qartë, pasi ekipet vendase kanë fituar ndeshjet e para në udhëtim me rezultat të thellë 3-0.