Adrenalina e garave virtuale u rikthye mbrëmë me plot intensitet, teksa Sim Race Kosova organizoi garën më të fundit në disiplinën F1 Esport, në pistën ikonike të Bahreinit, nën dritat magjike të natës.

Ngjarja nisi në orën 19:00, me një sesion praktik prej 1 ore, 17 minuta kualifikime dhe një garë kryesore me 29 xhiro plot aksion.

Gjashtë pilotë të talentuar morën pjesë në garë, duke shfaqur aftësi, precizitet dhe përkushtim të madh. Kampioni në fuqi, Enver Suhodolli, dëshmoi edhe një herë dominimin e tij duke fituar garën bindshëm. Pas tij u rendit Jetmir Kojqiqi, me një paraqitje shumë të fortë e të qëndrueshme, ndërsa podiumi u plotësua nga Leon Berisha, me një rezultat të merituar në vendin e tretë.

As pjesa e mesme e renditjes nuk zhgënjeu – Adriot Kelmendi, Blendi Ferizi (në debutimin e tij për këtë sezon), dhe Getoar Salihu ofruan duele të zjarrta përgjatë garës, duke sjellë emocione të veçanta për të gjithë shikuesit.

Ngjarja u transmetua drejtpërdrejt në kanalin Sim Race Kosova në Facebook, me komentim LIVE nga Engjëll Berbatovci, i cili i dha edhe më shumë gjallëri përvojës së shikuesve.

Ndërsa kampionati virtual vazhdon të nxehet, vëmendja tani zhvendoset drejt Çmimit të Madh të Katarit, i cili do të zhvillohet më 01.06.2025. Qëndroni me ne për më shumë aksion!