Kombëtarja e Kosovës në xhudo është gati për një tjetër sfidë të madhe ndërkombëtare, këtë herë në Kampionatin Botëror që do të zhvillohet në kryeqytetin e Hungarisë, Budapest, nga data 13 deri më 20 qershor 2025. Ky është një prej turneve më prestigjioze të xhudos, ku do të marrin pjesë 557 sportistë elitarë nga plot 93 shtete përfaqësuese të të gjitha kontinenteve.

Kosova do të përfaqësohet me tre nga xhudistët më të suksesshëm të saj: Distria Krasniqi, që garon në kategorinë -52 kg, Laura Fazliu në kategorinë -63 kg dhe Akil Gjakova në kategorinë -73 kg. Të tre sportistët janë emra të dëshmuar në arenën ndërkombëtare, me medalje olimpike, evropiane e botërore në historikun e tyre, transmeton AutoPortali.

Skuadra është nën drejtimin e trajnerëve të mirënjohur: Driton Kuka, kryetrajneri i Kombëtares që ka qenë forca lëvizëse pas suksesit të xhudos kosovare, Fatos Tabaku, si dhe Majlinda Kelmendi, kampione olimpike dhe botërore, e cila tashmë është pjesë e stafit teknik dhe një shembull frymëzimi për brezat e rinj.

Sipas kalendarit të garave, Distria Krasniqi do të zbresë në tatami ditën e shtunë, më 14 qershor. Akil Gjakova do të garojë të dielën, më 15 qershor, ndërsa Laura Fazliu do ta ketë duelin e saj të parë të hënën, më 16 qershor.

Për Kosovën, ky kampionat përbën jo vetëm një mundësi për të fituar medalje të reja, por edhe për të forcuar pozicionin e saj si një fuqi në rritje në sportin e xhudos në nivel botëror. Pritshmëritë janë të larta, dhe mbështetja për xhudistët tanë nuk mungon as nga publiku dhe as nga institucionet.