Mesfushori i Kombëtares së Shqipërisë, Nedim Bajrami, është duke u përfolur shumë kohët e fundit lidhur me të ardhmen e tij te Rangers, pasi aventura e tij në skuadrën skoceze këtë sezon nuk ka qenë ashtu siç pritej.

Pas disa paraqitjeve jo shumë të qëlluara dhe për shkak të konkurrencës së fortë në ekip, shumë media dhe tifozë kanë nisur të spekulojnë për një largim të mundshëm të Bajramit në merkaton verore, transmeton AutoPortali.

Megjithatë, vetë lojtari ka dhënë një përgjigje të qartë në lidhje me këto spekulime, duke treguar se aktualisht është i përqendruar te Rangers, por duke lënë dyert hapur për çdo mundësi që mund të vijë në të ardhmen.

“Në futboll, kurrë mos thuaj kurrë,” ka deklaruar Bajrami në një intervistë të fundit, duke shtuar:

“Momentalisht jam i fokusuar vetëm te Rangers.”

Ky mesazh duket si një sinjal për tifozët skocezë se mesfushori shqiptar është i gatshëm të vazhdojë sfidën me klubin dhe të përmirësojë performancat e tij në sezonin e ardhshëm. Ai synon të lërë gjurmë më të thella dhe të kontribuojë më shumë në sukseset e Rangers.

Gjithsesi, në botën e futbollit, situata mund të ndryshojë shpejt, ndaj fjalët e Bajramit janë kujtesë se asnjëherë nuk duhet të përjashtosh asnjë skenar, sidomos në merkato.