Estonezi Ott Tanak i ka sjellë Hyundait fitoren e parë këtë sezon në Rallyn e Akropolit në Greqi, duke ndërprerë dominimin e Toyotës. Francezi Sebastien Ogier përfundoi në vend të dytë, përpara bashkëkombësit të tij Adrien Fourmaux (Hyundai), i cili zuri vendin e tretë.
Tanak nuk u dha asnjë shans rivalëve që nga pasditja e së premtes, kur mori kryesimin. Kampioni i botës në vitin 2019 përfundoi garën me më shumë se 30 sekonda përpara Ogierit (+32.8), pavarësisht një problemi me ndërruesin e shpejtësive në fund të garës.
“Ishte një fundjavë e shkëlqyer. Dhamë gjithçka nga vetja dhe arritëm të shmangnim problemet”, tha Tanak pas fitores së tij të 22-të në karrierë dhe të parës në rallyn grek.
Hyundai nuk kishte fituar një garë në WRC që nga Rally i Evropës Qendrore në tetorin e kaluar, garë që po ashtu ishte fituar nga Tanak.
Në gjashtë garat e para të këtij viti, fituesit ishin gjithmonë pilotët e Toyotës.
Pas protagonistëve kryesorë të fundjavës, Adrien Fourmaux, një tjetër pilot i Hyundait, barazoi rezultatin e tij më të mirë në WRC duke zënë vendin e tretë.
Uellsi Elfyn Evans (Toyota), që është lider në renditjen e kampionatit botëror për pilotë, përfundoi në vendin e katërt, përpara kampionit aktual të botës, belgut Thierry Neuville (Hyundai), i cili përfundoi i pesti.
Në renditjen e përgjithshme, Evans ka vetëm nëntë pikë më shumë se ndjekësi i tij i parë, Sebastien Ogier. Megjithatë, francezi nuk merr pjesë në të gjitha garat dhe sipas revistës së specializuar franceze AutoHebdo, ai do të pauzojë deri në shtator për Rallyn e Kilit. Tanak ndodhet 12 pikë pas Evans.
Gara e radhës do të zhvillohet në Estoni, ku Tanak, pas fitores mbresëlënëse në Greqi, do të jetë një nga favoritët kryesorë përpara publikut vendas, megjithëse ai ka fituar vetëm një herë në shtëpi (në vitin 2020), ndërsa Rovanpera ka fituar aty tre herë radhazi (2021–2023).
Rally Akropolis – Rezultatet
Ott Tanak / Martin Jarveoja (Est/Hyundai) – 4:12:20.1
Sebastien Ogier / Vincent Landais (Fra/Toyota) +32.8
Adrien Fourmaux / Alexandre Coria (Fra/Hyundai) +3:09.8
Elfyn Evans / Scott Martin (VBR/Toyota) +3:31.1
Thierry Neuville / Martijn Wydaeghe (Bel/Hyundai) +8:59.5
Kampionati Botëror – Pilotët (7/14 gara):
Elfyn Evans (VBR) – 150 pikë
Sebastien Ogier (Fra) – 141
Ott Tanak (Est) – 138
Kalle Rovanpera (Fin) – 119
Thierry Neuville (Bel) – 96
Kampionati Botëror – Skuadrat (7/14 gara):
Toyota – 358 pikë
Hyundai – 293
M-Sport Ford – 97
