McLaren është në rrugë të mirë për të thyer rekordin e pabesueshëm të Red Bullit në Formula 1.

Kush do ta kishte menduar se rekordi i Red Bullit për numrin e pikëve të fituara në renditjen e konstruktorëve në vitin 2023 do të vihej në rrezik vetëm dy vite më vonë?

Pikërisht në një situatë të tillë ndodhet Red Bulli në mesin e këtij sezoni emocionues, sepse McLaren është shumë pranë vendosjes së një rekordi të ri.

Skuadra nga Wokingu, me Oscar Piastrin dhe Lando Norrisin në timon, ka mbledhur tashmë 460 pikë pas 12 garash, dhe është vetëm çështje kohe kur do të mbrojë titullin në renditjen e konstruktorëve, pasi vitin e kaluar zhvilluan një luftë të madhe me Ferrarin.

Ekziston madje edhe një mundësi e vogël, duke pasur parasysh se kanë mbetur edhe 12 gara dhe katër sprinta, gjithsej 576 pikë në lojë, që McLaren të kalojë edhe kufirin magjik prej 1.000 pikësh, edhe pse për një gjë të tillë do të duheshin shumë fitore me vendin e parë dhe të dytë.

Megjithatë, rekordi i Red Bullit nga viti 2023, që është 860 pikë, është gjithsesi i arritshëm.

Ato pikë, atëherë, ish-shefi i skuadrës Christian Horner i quajti “njëbrirësh” (unicorn), pasi ekipi fitoi në 21 nga 22 garat, me Max Verstappen që triumfoi plot 19 herë.

Në atë sezon, ata e kaluan rekordin e mëparshëm të Mercedesit nga viti 2016, i cili ishte 765 pikë.

Është e vërtetë që atë vit u zhvilluan dy gara më pak sesa këtë sezon, kështu që krahasimi është pjesërisht relativ, por rekordi do të mbetet zyrtarisht në fuqi.

Edhe pas 22 garash këtë vit, është shumë e mundur që McLaren të tejkalojë ato 860 pikë.