Skuadra saudite Al-Nassr, e njohur për ambiciet e mëdha në merkato, po vazhdon përpjekjet për të ndërtuar një ekip me yje ndërkombëtarë dhe për të rritur nivelin konkurrues në kampionatin saudit.
Objektivi më i fundit i klubit është mbrojtësi i majtë i Chelseat, Marc Cucurella.
Sipas “Marca”, Al-Nassr është seriozisht i interesuar për shërbimet e spanjollit 27-vjeçar, i cili konsiderohet si një alternativë ideale për të përforcuar krahun e majtë të mbrojtjes, transmeton AutoPortali.
Klubi është në fazën përgatitore të një oferte zyrtare që do t’i dorëzohet së shpejti klubit londinez, dhe besohet se bëhet fjalë për një shumë të konsiderueshme, që “do ta bëjë të vështirë refuzimin”.
Cucurella i cili iu bashkua Chelseat në verën e vitit 2022 nga Brighton për një shumë prej mbi 60 milionë eurosh, ka kontratë të vlefshme deri në qershor 2028.
Megjithëse forma e tij në sezonin e kaluar ka pasur luhatje, ai mbetet një nga mbrojtësit e majtë më të vlerësuar në Premier League për dinamizmin dhe kontributin në sulm dhe mbrojtje.
Pavarësisht interesimit konkret nga Arabia Saudite, vetë lojtari thuhet se preferon të qëndrojë në Premier League, ku ndien se ka ende shumë për të dhënë.
Por, oferta e Al-Nassr përfshin jo vetëm një pagë të majme, por edhe një rol lideri në skuadër – faktorë që mund të ndikojnë në vendimin e tij.
Trajneri i ri i Chelseat, Enzo Maresca, i cili është në prag të nisjes së sezonit të tij të parë në “Stamford Bridge”, e ka shprehur publikisht se e konsideron Cucurellën një element kyç në skemat e tij taktike.
Ai synon ta ruajë balancën në skuadër, veçanërisht pas disa largimeve që priten gjatë verës.
Nga ana tjetër, Al-Nassr po tregon vendosmëri të lartë në strategjinë e re të merkatos, duke synuar të sjellë në Arabinë Saudite emra të njohur nga futbolli evropian. Krahas Cucurellës, klubi po punon gjithashtu edhe për transferimin e sulmuesit portugez Joao Felix, aktualisht lojtar i Atletico Madrid por që kaloi sezonin e fundit në huazim te Barcelona.
Nëse Al-Nassr arrin të sigurojë firmën e dy lojtarëve të përmendur, do të ishte një tjetër sinjal i qartë se futbolli saudit po investon fuqishëm për të tërhequr yje nga elita e Evropës dhe për të rritur imazhin global të kampionatit të tyre. /AutoPortali
