Tashmë është gjithçka gati për garën e madhe, Drag Race 2, e cila mbahet gjatë dy ditëve të kësaj fundjave (2 e 3 gusht) në pistën e vjetër të aeroportit në Sllatinë.

Garues të dëshmuar nga vendi e rajoni kanë aplikuar për garë, prandaj spektakli është mëse i garantuar.

“Hijeshinë” e garës, e sigurisht edhe konkurrencën, do t’ia shtojnë edhe mërgimtarët tanë, të cilët aktualisht janë për pushime në vendlindje.

Agjenda e garës

Gjithçka nis të shtunën në orën 08:30 – 10:00, kur në pikën e derivateve “Shell” në Sllatinë bëhet paraqitja në garë dhe pajisja me numrat startues.

Në të njëjtin vend, nga ora 08:30 – 11:00 bëhet kontrollimi teknik i veturave dhe verifikimi i dokumentacionit.

Në orën 11:45 është brifingu me garues, derisa në 12:00 nisin kualifikimet, të cilat përbëhen nga dy vozitje ku secilës veturë do t’i matet koha dhe do t’i përcaktohet klasa.

15 minuta pas përfundimit të kualifikimeve, publikohen rezultatet kualifikuese, përcaktohen klasat dhe publikohet lista startuese.

Pas 15 minutave tjerë nisin garat në Drag Race 2, duke filluar nga klasa 16, pastaj 15, 14, 13 dhe 12.

Gara në këto klasa, në dy divizionet (AWD dhe FWD/RWD) mbahet të shtunën.

30 minuta pas përfundimit bëhet shpallja e fituesve dhe ndarja e shpërblimeve.

Të dielën nga ora 10:00 – 10:45 është brifingu me garues, ndërsa në orën 11:00 nis gara për klasën 11, për të vazhduar me klasën 10, 9…

30 minuta pas përfundimit, bëhet shpallja e fituesve dhe ceremonia e ndarjes së çmimeve.