Max Verstappen do të rikthehet në garat GT3 më 16–18 tetor, në finalen e GT World Challenge Europe në Portimao të Portugalisë.

Piloti i Red Bull do të garojë me një Mercedes-AMG GT3 për ekipin Verstappen Racing, ndërsa në të njëjtën kategori do të jetë edhe legjenda e MotoGP-së, Valentino Rossi, që garon për BMW WRT.

Verstappen do të zëvendësojë pilotët e tij të zakonshëm, Jules Gounon dhe Daniel Juncadella, të cilët do të jenë të angazhuar në një garë tjetër të WEC.

Me këtë garë, Verstappen do të ketë një periudhë shumë të ngarkuar, me shtatë gara radhazi në shtatë javë, nga Çmimi i Madh i Azerbajxhanit deri në Çmimin e Madh të Brazilit.

“Do të jenë shtatë javë të ngarkuara, por do ta bëjmë. Më pëlqen Portimao dhe më pëlqen të jem në Portugali”, tha Verstappen.

29-vjeçari synon gjithashtu të rikthehet në 24 Orët e Nurburgring-ut në vitin 2027 dhe të marrë pjesë në 24 Orët e Spa-Francorchamps.