Viti 2027 pritet të sjellë risi të rëndësishme nga prodhuesit italianë të automobilave, në kuadër të grupit Stellantis.
Fiat do të hapë në janar porositë për modelet e reja Grizzly dhe Grizzly Fastback. Çmimi fillestar pritet të jetë rreth 20,000 euro për versionin me motor turbo-benzinë prej 100 kuajfuqish. Në ofertë do të jenë edhe versionet hibride dhe plotësisht elektrike.
Një tjetër risi e rëndësishme do të jetë Fiat Grande Panda 4×4, me tërheqje në të katër rrotat. Gjithashtu, kompania po përgatit një veturë të vogël elektrike me emrin e përkohshëm Koala, e cila pritet të prezantohet si koncept para vitit 2028.
Edhe Alfa Romeo ka plane ambicioze. Në fund të vitit 2027 pritet prezantimi i një SUV-i të ri, pasardhës i modelit Tonale, ndërsa në përgatitje është edhe një veturë sportive në seri të kufizuar. Modelet Giulia dhe Stelvio do të vazhdojnë prodhimin të paktën deri në fund të vitit 2027.
Ndërkohë, Lancia do të nisë shitjen e modelit të ri Gama në Evropë. Crossover-i do të ofrohet me motor hibrid prej 145 kuajfuqish dhe versione elektrike deri në 375 kuajfuqi, me autonomi të paralajmëruar mbi 740 kilometra.

Gjithashtu, mbetet e hapur mundësia e rikthimit të modelit legjendar Lancia Delta, i cili fillimisht ishte planifikuar për vitin 2028.
Me këto modele të reja, Fiat, Alfa Romeo dhe Lancia synojnë të forcojnë praninë e tyre në tregun evropian, duke zgjeruar ofertën me vetura hibride dhe elektrike.



