Mekanikët britanikë kanë analizuar në detaje SUV-in kinez Omoda 7, i cili ofron 279 kuaj fuqi, pajisje të pasura dhe 8 vite garanci. Megjithatë, kontrolli në lift zbuloi disa dobësi që mund të ndikojnë në jetëgjatësinë e tij.

Modeli hibrid ka motor 1.5 turbo, motor elektrik dhe bateri 18.4 kWh. Sipas prodhuesit, mund të përshkojë deri në 90 kilometra vetëm me energji elektrike, ndërsa konsumi mesatar i deklaruar është 2.3 litra për 100 kilometra.

Problemi kryesor u zbulua në pjesën e poshtme të veturës. Mekanikët konstatuan mbrojtje jo të njëtrajtshme kundër ndryshkut, si dhe kabllo elektrike të ekspozuara ndaj lagështisë dhe dëmtimeve mekanike.

Shqetësim të veçantë paraqet edhe pllaka ftohëse e baterisë. Në rast dëmtimi serioz, mund të nevojitet zëvendësimi i gjithë baterisë, me kosto që vlerësohet në afro 24.000 euro.

Gjatë diagnostikimit elektronik u regjistruan 26 gabime, por shumica rezultuan të vjetra dhe të lidhura me rënien e tensionit të baterisë.

Përfundimi i mekanikëve: Omoda 7 ofron shumë teknologji dhe pajisje për çmimin e saj, por pronarët që planifikojnë ta mbajnë për shumë vite duhet t’i kushtojnë vëmendje mbrojtjes kundër korrozionit dhe furnizimit me pjesë rezervë.