Zakonisht në një shitje pronash bujqësore prisni të gjeni pajisje si kositëse, plugje apo silo për grurë – jo një Ferrari F40 të pastër. Por pikërisht kjo makinë e rrallë do të shitet në ankandin e falimentimit të Santa Paula Hay & Grain javën e ardhshme.

Ky F40 me specifikime amerikane u dorëzua në Kaliforni në vitin 1991 dhe ka kaluar nëpër duart e pesë pronarëve në shtete të ndryshme si Pensilvania, Oklahoma dhe Utah, për t’u kthyer më në fund në Kaliforni në vitin 2020. Tani, po shitet nga Icon Servicing, i caktuar nga gjykata, shkruan autoweek, transmeton AutoPortali.

Duke qenë ankand federal, makina do të shitet pa tarifa shtesë. RM Sotheby’s ka paraqitur një ofertë fillestare prej 2.55 milionë dollarësh, ndërsa çmimi “bleje tani” është 5 milionë dollarë – dukshëm më i lartë se vlera mesatare e tregut, që është rreth 2.6 milionë dollarë sipas Classic.com.

Edhe pse F40 është një nga Ferrarit më të dashur, nuk është ndër më të rrallët – janë prodhuar mbi 1,300 njësi, me vetëm 213 prej tyre për tregun amerikan. Versioni amerikan ishte më i rëndë për shkak të standardeve të sigurisë dhe pajisjeve shtesë si ajri i kondicionuar, por përfitonte rezervuarë alumini më praktikë.

Pra, kemi një F40 të rrallë, me histori të pazakontë dhe një vendndodhje akoma më të çuditshme – një fermë. Mund të mos jetë më ekskluzivi nga krijimet e Maranellos, por asnjë tjetër nuk ka një histori si kjo.