Lewis Hamilton ka marrë meritën për një ndryshim të rëndësishëm rregullash në Çmimin e Madh të Monakos, i cili pritet t’i japë një avantazh të ndjeshëm Ferrarit.

FIA ka miratuar përdorimin e detyrueshëm të tre përbërjeve të ndryshme të gomave këtë fundjavë, duke e bërë të pashmangshme strategjinë me dy ndalesa në bokse, një propozim që Hamilton e ka mbrojtur prej vitesh.

Ky ndryshim vjen në një garë ku parakalimet janë thuajse të pamundura dhe do të detyrojë skuadrat të ndjekin strategji më dinamike. Ferrari, skuadra e re e Hamilton, është aktualisht lider në ndalesat më të shpejta në bokse për sezonin 2025, duke e bërë këtë ndryshim një përparësi të qartë për britanikun.

Hamilton, i cili për herë të parë këtë sezon mposhti shokun e skuadrës Charles Leclerc në një garë kryesore në Imola, mund të përfitojë ndjeshëm në një pistë ku pozicioni dhe strategjia janë vendimtare. Pirelli gjithashtu ka zgjedhur përbërjet më të buta për këtë fundjavë, duke premtuar më shumë aksion pas kritikave për garën e mërzitshme të vitit të kaluar.

Ky rregull i ri mund të ndryshojë rrjedhën e garës në Monako dhe të ofrojë më shumë spektakël në një nga pistat më ikonike, por të vështira të Formula 1.