Kapiteni i Real Madridit, Luka Modrić, ka dhënë një përditësim lidhur me të ardhmen e tij dhe mundësinë për një transferim gjatë kësaj vere.

Pas vendimit të klubit për të mos rinovuar kontratën e tij për sezonin 2025/2026, Modrić është i përgatitur t’i japë fund një periudhe të jashtëzakonshme 13-vjeçare në kryeqytetin spanjoll, por nuk ka në plan të pensionohet, tranmseton AutoPortali.

Mesfushori 39-vjeçar kishte shprehur më herët dëshirën për të nënshkruar një kontratë të re njëvjeçare me Real Madridin, me synimin për të vazhduar të luajë edhe pas ditëlindjes së 40-të në shtator dhe për të udhëhequr Kroacinë në Kupën e Botës 2026.

Kontrata e tij aktuale nuk përfundon në qershor, pasi ai pritet të jetë pjesë e skuadrës së Real Madridit në Kupën e Botës për Klube që zhvillohet në SHBA, një turne që mund të zgjasë deri në mesin e korrikut.

Modrić ka marrë oferta nga MLS dhe Superliga e Arabisë Saudite, por preferenca e tij mbetet Evropa – në veçanti, dëshira për të vazhduar të luajë në Ligën e Kampionëve.

Qëndrimi në formë të lartë për Kupën e Botës 2026 është ndër objektivat kryesorë të Modrić, dhe sipas raportimeve, AC Milan po del si kandidati kryesor për të siguruar shërbimet e tij.

Drejtori i ri sportiv i Milanit, Igli Tare, thuhet se ka udhëtuar drejt Kroacisë për t’u takuar me Modrić, dhe sipas Football Italia, është arritur një marrëveshje për termat personalë me mesfushorin.

Kontrata e mundshme do të jetë për një sezon, me mundësi zgjatjeje edhe për një vit tjetër, ndërsa Modrić do të përfitonte rreth 3 milionë euro në vit.

Së fundmi, Modrić u aktivizua nga stoli në fitoren 7-0 të Kroacisë ndaj Gjibraltarit në kualifikueset e Kupës së Botës dhe pritet të mbajë shiritin e kapitenit në ndeshjen kundër Çekisë më 9 qershor.

“Milan? Nuk mund të them asgjë për transferimet. Dua të qëndroj i përqendruar te gjithçka që më pret me Real Madridin dhe kombëtaren.”

“Ende nuk kam marrë një vendim përfundimtar, pavarësisht kontakteve që kanë ndodhur. Kjo është e vetmja e vërtetë,” përfundoi Modrić.