E ardhmja e Milot Rashicës mund të jetë shumë shpejt në futbollin italian.
Pas një sezoni solid me Beshiktashin në Superligën turke, sulmuesi i Kombëtares së Kosovës është bërë objektiv i Genoas, skuadër që garon në Serie A.
Sipas raportimeve nga mediat turke dhe italiane, klubi italian ka dërguar ofertën e parë zyrtare në drejtim të Beshiktashit në vlerë 8 milionë euro, transmeton AutoPortali.
Megjithëse kjo shumë nuk përputhet plotësisht me kërkesat e klubit nga Stambolli, i cili synon të arkëtojë rreth 9 milionë euro, negociatat janë në fazë të avancuar dhe palët janë optimiste për një marrëveshje të mundshme.
Rashica nuk bën pjesë në planet afatgjata të trajnerit të ri të Beshiktashit, ndërsa drejtuesit e klubit janë të gatshëm ta lënë të lirë nëse vjen oferta e duhur.
Genoa po kërkon të përforcojë repartin ofensiv me një lojtar të shpejtë, teknik dhe të përshtatshëm për stilin e futbollit italian – dhe Rashica shihet si profil ideal.
28-vjeçari ka kontratë me Beshiktashin deri në vitin 2027, por transferimi i tij këtë verë duket gjithnjë e më i mundshëm.
Në sezonin 2023/24, Rashica ka zhvilluar 41 ndeshje, duke realizuar 5 gola dhe dhënë 12 asistime, duke qenë një nga kontribuesit më të rregullt në formacion.
Rashica ka përvojë të gjerë në ligat evropiane, përfshirë Bundesliga-n dhe Premier League, dhe një kalim në Serie A do të ishte një tjetër hap i rëndësishëm në karrierën e tij ndërkombëtare.
