Nuk ka vend si TT Circuit Assen në Holandë që ka pritur çdo yll të MotoGP gjatë këtyre 100 viteve dhe padyshim që do të jetë dëshmitar edhe i kampionëve të së ardhmes. Një pistë që ngrihet gradualisht për të arritur në një duel final në shikan, Assen ka qenë skena e shumë betejave gjatë viteve. Nga zhgënjimi deri tek ekstaza, beteja në xhiron e fundit apo dalje nga pista.
2006: Hayden kundër Edwards në shikan
Çmimi i Madh i Holandës në 2006 ishte i pari në TT Circuit Assen të rikonfiguruar, por kjo nuk pengoi një përballje epike mes amerikanëve Nicky Hayden dhe Colin Edwards. Dukej sikur Edwards do të fitonte garën e tij të parë në MotoGP, por një gabim në shikan bëri që ai të rrëshqiste dhe të rrëzohej pak metra larg fitores. Hayden përfitoi dhe mori fitoren e vetme jashtë SHBA-së, në rrugën e tij drejt titullit kampion.
2013: ‘Doktori’ rikthehet te fitorja, ndërsa Lorenzo dhuron një paraqitje heroike
Pas dy vitesh pa fitore me Ducati-n, Valentino Rossi ishte rikthyer me Yamaha në 2013 dhe menjëherë rikthehet në formë. Në Assen, ai realizoi një paraqitje dominuese që kujtoi ditët e tij të lavdishme, duke treguar se mbetej ende një forcë në pistë. Ndërkohë, shoku i tij i skuadrës Jorge Lorenzo, vetëm 48 orë pasi theu klavikulën, bëri një nga garat më heroike në historinë e MotoGP-së, duke përfunduar në vendin e pestë, një arritje e jashtëzakonshme duke parë dhimbjet që kishte.
2015: Përplasja Rossi – Marquez në xhiron e fundit
Një klasik i përjetshëm dhe një nga përballjet më të mëdha mes dy legjendave të MotoGP-së. Rossi e udhëhoqi xhiron e fundit me 0.4 sekonda përpara Marquez, por kampioni në fuqi nuk u dorëzua. Me një manovër agresive në shikan, Marquez shtyu Rossi-n jashtë piste, duke detyruar ‘Doktorin’ të kalonte në zhavorr. Megjithatë, Rossi arriti të fitojë, me Marquez që u rendit i dyti – një tjetër duel për historinë.
2016: Miller fiton në shi
Gara e vitit 2016 kishte gjithçka: Yonny Hernandez humbi nga një pozitë surprizë udhëheqëse, shiu i rrëmbyeshëm solli ndërprerjen e garës dhe pas rinisjes, Rossi doli nga gara ndërsa ishte në vendin e parë. Në këto kushte të lagështa, shkëlqeu për herë të parë Jack Miller – me një paraqitje perfekte, ai fitoi garën në sezonin e tij të dytë në MotoGP dhe solli për herë të parë “Shoey”-n në podium.
2018: Assen në kulmin e vet
Një betejë gjatë gjithë garës mes Rossi-t, Marquez-it, pilotëve të Ducati-t – Lorenzo dhe Dovizioso, si dhe Viñales, Crutchlow dhe Rins nga Suzuki. Ishte një garë ku pilotët ndryshonin pozicion thuajse në çdo kthesë. Në fund, ishte Marquez ai që u shkëput në momentin e duhur për të marrë fitoren përpara Rins dhe Viñales. Një tjetër spektakël tipik i Assenit.
