Pauza e gjatë para garës së ardhshme të Formula 1, që do të zhvillohet në Majami në fillim të majit, do t’u japë ekipeve mundësinë të bëjnë ndryshime të mëdha në makinat e tyre, të cilat kanë mbetur pothuajse të pandryshuara gjatë tri garave të para të sezonit.
Për këtë arsye, shefi i Ferrari, Frederic Vasseur, tha se në Majami mund të shohim një rishpërndarje serioze të forcave në kampionatin botëror. Sipas tij, fundjava në jug të Floridës do të shënojë praktikisht fillimin e një kampionati të ri të Formula 1.
“Të gjithë do të punojmë për përmirësime në Majami. Do të kemi kohë për të avancuar zhvillimin dhe për këtë arsye mendoj se aty do të nisë një kampionat i ri. Nuk do të jemi të vetmit që do të punojmë shumë mes Japonisë dhe Majamit, ndaj duhet të jemi të kujdesshëm”, tha ai.
“Është e vërtetë që tani kemi një muaj pa gara, gjë jo tipike për Formula 1. Të gjitha ekipet në start po përpiqen të përmirësohen. Secili do të bëjë një hap përpara dhe do të shohim si do të ndryshojë situata.”
Sa i përket objektivave të Ferrarit, Vasseur shtoi:
“Duhet të vazhdojmë të mbledhim pikë, të ngjitemi në podium dhe të qëndrojmë afër Mercedes. Të mbetemi në krye të renditjes. Niveli i zhvillimit në kampionat do të jetë shumë i lartë, ndaj duhet të vazhdojmë të shtyjmë përpara në këta muaj për të grumbulluar sa më shumë pikë”.
Pauza e gjatë mes garave në Japoni dhe Majami është shkaktuar nga anulimi i garave në Bahrain dhe Saudi Arabia, të cilat ishin planifikuar për 12 dhe 19 prill. Për shkak të situatës në Lindjen e Mesme, ato nuk u zhvilluan, duke krijuar një ndërprerje pesëjavore mes raundit të tretë dhe të katërt të sezonit.
