Hyundai ka zbuluar një dizajn të veçantë për raundin e kësaj jave në Kroaci në Kampionatin Botëror të Rallyt (WRC), i cili i kushtohet të ndjerit Craig Breen.
Breen humbi jetën në një aksident gjatë testimeve para garës në vitin 2023, teksa përgatitej për Rally Kroacinë si pjesë e ekipit zyrtar të Hyundai.
Që nga ajo kohë, ekipi ka mbajtur mbishkrimin “ForCraig” në makinat e tij, por këtë fundjavë do të përdorë një skemë të veçantë ngjyrash në nder të pilotit irlandez shumë të dashur.
Dizajni përfshin portrete të Breen në anët dhe në çatinë e Hyundai i20 N Rally1, së bashku me një version më të madh të logos “ForCraig” dhe frazën e tij ikonike “flat to the square right”.
Gjithashtu, në dizajn përfshihet edhe një homazh për Fondacionin Craig Breen, i krijuar në vitin 2023 për të mbështetur brezin e ri të talenteve të rally-t në Irlandë, duke ofruar mbështetje financiare dhe trajnim profesional.
Presidenti i Hyundai Motorsport, Cyril Abiteboul, tha se ekipi dëshiron ta kujtojë Breen jo vetëm si pilot, por edhe si njeri, duke theksuar pasionin e tij për sportin dhe për ndihmën ndaj talenteve të rinj.
Hyundai shkon në Kroaci pasi arriti të thyejë dominimin e Toyotës në podium, falë vendit të dytë të Adrien Fourmaux në Rally Safari në Kenia muajin e kaluar.
Rally i këtij viti në Kroaci do të sjellë një sfidë të re në asfalt, me disa ndryshime në itinerar, përfshirë zhvendosjen nga Zagrebi në qytetin bregdetar të Rijekës.
