Max Verstappen po përgatitet për një nga sfidat më të mëdha të karrierës së tij jashtë Formula 1: debutimin në garën legjendare 24 Orët e Nurburgringut në vitin 2026. Kampioni holandez do të jetë pjesë e ekipit Team Verstappen Racing me një Mercedes-AMG GT3, por rruga drejt triumfit nuk pritet të jetë aspak e lehtë.
Gara ikonike në Nordschleife konsiderohet një nga më të vështirat në botën e motorsportit dhe këtë vit konkurrenca pritet të jetë më e ashpër se kurrë. Verstappen do të ketë përballë disa nga emrat më të mëdhenj të garave GT3, ekipe me eksperiencë të jashtëzakonshme dhe makina që prej vitesh dominojnë “Ferrin e Gjelbër”.
Një nga kundërshtarët kryesorë pritet të jetë ekipi Scherer-Phx me Audi R8 LMS GT3, i cili ka treguar formë fantastike në garat kualifikuese. Po ashtu, Lamborghini i ekipit Abt konsiderohet favorit serioz për fitore, falë përvojës së pilotëve si Mirko Bortolotti dhe Patric Niederhauser.
Në listën e pretendentëve nuk mungon as Porsche Manthey “Grello”, një emër legjendar në Nürburgring, që tradicionalisht ka qenë ndër makinat më të forta në këtë pistë. Edhe BMW pritet të luftojë fort për podiumin, pasi ka treguar shpejtësi të madhe në sesionet testuese dhe kualifikuese.
Interesi për edicionin e vitit 2026 është rritur ndjeshëm pikërisht për shkak të pjesëmarrjes së Verstappen. Organizatorët kanë konfirmuar mbi 160 makina të regjistruara, shifra më e lartë në më shumë se një dekadë, duke e kthyer këtë edicion në një spektakël të vërtetë për fansat e motorsportit.
Tani mbetet të shihet nëse superylli i Formula 1 mund të dominojë edhe në një nga garat më brutale të qëndrueshmërisë, apo nëse specialistët e Nürburgringut do t’i tregojnë se “Ferri i Gjelbër” nuk fal askënd.
