Fabio Di Giannantonio ka arritur marrëveshje me KTM dhe do t’i bashkohet ekipit zyrtar të prodhuesit austriak në MotoGP duke filluar nga sezoni 2027, raportojnë mediat në paddock-un e klasës mbretërore.

Piloti aktual i VR46 ka vendosur të largohet nga Ducati dhe ekipi i Valentino Rossi-t pas përfundimit të kontratës, pasi nuk ka arritur marrëveshje për kushtet e reja financiare dhe statusin që kërkonte si pilot fabrike.

Sipas raportimeve, Di Giannantonio kishte vendosur afat për Ducati-n dhe VR46 për t’i ofruar një kontratë të re që përmbushte kërkesat e tij, por pasi palët kërkuan më shumë kohë, ai vendosi të pranojë ofertën e KTM.

Në ekipin e ri, ai pritet të jetë shok skuadre me Alex Marquez, i cili gjithashtu ka siguruar kalimin e tij te KTM për të njëjtën periudhë.

Di Giannantonio ka si synim kryesor të marrë statusin e pilotit fabrike dhe një pagë më të lartë, rreth 2 milionë euro në vit. KTM i ka plotësuar këto kushte, ndërsa marrëveshja mes palëve është finalizuar në fundjavë.

Kjo lëvizje e italianit hap një vend vakant te VR46, ku pritet të hyjë një pilot tjetër, ndërsa ndryshimet në merkato mund të ndikojnë edhe në skuadra të tjera të MotoGP në sezonet e ardhshme.