FIA ka vendosur që aerodinamika aktive të mos përdoret në Çmimin e Madh të Monakos për arsye sigurie. Ekzistonte frika që makinat të bëheshin shumë të shpejta në daljen nga Tuneli, për shkak të zonave të kufizuara të sigurisë.

Kjo do të thotë se gara në Monte Carlo do të zhvillohet me profile fikse aerodinamike dhe pa “straight mode”, ndërsa nuk do të ketë as DRS, që përdorej deri sezonin e kaluar.

Monako pritet të jetë një garë unike, ku skuadrat mund të përdorin zgjidhje specifike vetëm për këtë pistë. Ferrari shihet si një nga favoritët, pasi SF-26 konsiderohet shumë e fortë në kthesat e ngadalta dhe të mesme, edhe pse ka mungesë fuqie në shpejtësi të larta.

Mercedes mbetet skuadra për t’u mundur, pasi Kimi Antonelli dhe George Russell kanë fituar të gjitha garat e sezonit deri tani. Edhe McLaren, me bazën më të shkurtër të makinës në pistë, pritet të jetë konkurruese në rrugët e ngushta të Monakos.

Në një pistë ku parakalimet janë pothuajse të pamundura, gjithçka pritet të vendoset në xhiron kualifikuese. Ndërkohë, mbetet për t’u parë nëse ndonjë skuadër do të sjellë zgjidhje speciale për të surprizuar në Monte Carlo.