Francesco Bagnaia tha se në Çmimin e Madh të Francës u ndje për herë të parë që nga viti 2024 vërtet konkurrues në MotoGP. Italiani ka kaluar një periudhë të vështirë që prej sezonit të kaluar dhe në katër garat e para të vitit 2026 nuk arriti më lart se vendi i nëntë.

Megjithatë, testet në Jerez sollën përmirësime për Ducati-n, ndërsa në Le Mans Bagnaia fitoi “pole position”, mori podium në sprint dhe po luftonte për vendin e dytë para se të rrëzohej në kthesën e tretë.

“Kur pas një sezoni e gjysmë ndihesh sërish i shpejtë dhe më pas rrëzohesh, është shumë zhgënjyese”, tha dy herë kampioni i botës, duke pranuar se ishte ende i nervozuar pas garës.

Bagnaia shpjegoi se problemi që shkaktoi rrëzimin nuk ishte teknik dhe se ekipi tashmë e ka kuptuar situatën. Ai shpreson që fundjava në Barcelona të konfirmojë progresin e bërë pas testit në Jerez dhe paraqitjes pozitive në Le Mans.

“Gjetëm një drejtim që funksionoi mirë dhe tani duhet të kuptojmë nëse mund të jemi konkurrues në çdo pistë”, përfundoi italiani.