Fundjava e garave në Barcelonë u kthye në një makth të vërtetë. Gara në pistën Montmelo u ndërpre në xhiron e 12-të pas një incidenti të frikshëm ku u përfshi Alex Marquez. Në momentet kur piloti i Gresini po luftonte për fitore, një defekt teknik shkaktoi kaos total dhe disa ndërprerje të garës. Pas dy rinisjeve, fitoi Fabio Di Giannantonio, para Joan Mir dhe Fermín Aldeguer.
Megjithatë, rezultati mbeti në plan të dytë pasi Alex Marquez dhe Johann Zarco u dërguan menjëherë në Klinikën Universitare të Barcelonës. Gjithçka nisi kur Márquez po ndiqte nga afër Pedro Acosta. Në motorin KTM të Acosta-s papritur dështoi sistemi për rregullimin e lartësisë së motorit. Për të shmangur përplasjen direkte, Marquez ndryshoi trajektoren, doli jashtë piste pranë kthesës së dhjetë, humbi kontrollin mbi Ducati-n dhe u përplas fuqishëm me barrierat mbrojtëse.
Pas disa minutash ankthi, erdhën lajme inkurajuese – Márquez ishte jashtë rrezikut për jetën. Pas ndihmës së shpejtë mjekësore në pistë, ai ngriti dorën për të qetësuar tifozët. U konfirmua se kishte marrë goditje në fytyrë dhe në klavikulë. Pas aksidentit, Ducati i tij u kthye në pistë dhe u shpërbë, duke goditur edhe pilotë të tjerë, ndërsa Fabio Di Giannantonio rrëshqiti mbi pjesë të motorit, fatmirësisht pa pasoja serioze.
)
Kur situata dukej se ishte qetësuar, ndodhi një tjetër aksident i rëndë. Në kthesën e parë u rrëzuan Johann Zarco dhe Pecco Bagnaia. Këmba e pilotit francez mbeti e kapur te rrota e pasme e Ducati-t të Bagnaia-s, ndërsa motori u rrotullua dhunshëm në pistë. Ambulanca ndërhyri menjëherë dhe Zarco u transportua në të njëjtin spital ku ndodhet edhe Alex Marquez. Shefi i ekipit Honda deklaroi se Zarco nuk ka lëndime në kraharor apo pjesën e sipërme të trupit, por do t’i nënshtrohet kontrolleve të detajuara në këmbën e majtë.
🚨🇪🇸🏍️ ALERTE INFO | Énorme CRASH impliquant Alex Márquez en course au Moto GP de Barcelone.
La course a été interrompue et le drapeau rouge a été brandi. pic.twitter.com/EQsbu3VTrC
— Cerfia (@CerfiaFR) May 17, 2026
Pas gjithë kaosit, fitoren e mori Fabio Di Giannantonio për ekipin VR46. Në renditjen e përgjithshme vazhdon të kryesojë Marco Bezzecchi me 139 pikë, përpara Jorge Martín me 127 dhe Di Giannantonio me 116 pikë. Gara e radhës zhvillohet më 31 maj në Mugello.
